20-21 верасня ў Магілёве прайшла Міжнародная лёгкаатлетычная эстафета «Бег сяброўства». Акцыя стартавала 26 лютага ў Дубліне (Ірландыя), завершыцца — 27 верасня ў Маскве Яе дыстанцыя — самая працяглая ў свеце, яна праходзіць праз 49 еўрапейскіх краін. Беларусь у гэтым ланцужку — перадапошняя. Сярод 22 удзельнікаў прабегу — 9 беларусаў, якія суправаджаюць замежных госцяў па нашай краіне. Разам з удзельнікамі эстафеты па горадзе прабеглі вучні Магілёўскай гарадской ДЮСШ № 2 і ДЮСШ «Алімп» па лёгкай атлетыцы.

«Мы бяжым з еўрапейскай камандай ад Гародні (Грандичи, на мяжы з Літвой) да Віцебску (Ліёзна, мяжа з Расіяй), — патлумачыла Таццяна з Брэста, удзельніца прабегу. — Мы — не спартоўцы, а энтузіясты, група аматараў. Бягуць розныя людзі з рознымі прафесіямі — настаўнікі, лекары, ёсць нават капітан далёкага плавання. Бяжым у рознае надвор’е — і ў дождж, і ў холад. Дзіўна, што па дарозе да нас далучаюцца людзі. Асабліва радасна і цікава прабегчы дзецям, а патрымаць паходню для іх — сапраўднае свята!

У кожным горадзе нас сустракаюць вельмі цяпло і ветла — урачыстыя цырымоніі, афіцыйныя сустрэчы з прадстаўнікамі горада і адміністрацыі. Для нас гэта — добрыя пажаданні, караваі, песні. Еўрапейцам удвая цікава наведаць нашу краіну. Яны прызнаюцца, што чакалі ўбачыць зусім іншую Беларусь — такую, як паказвае заходняе тэлебачанне. Яны ў захапленні ад нашай краіны, ад нашых гарадоў. Ім падабаецца, што ў нас вельмі хораша і чыста, што тут мірныя, добразычлівыя і вельмі адкрытыя людзі».

«У сённяшнім прабегу ўдзельнічаюць 30 нашых вучняў, — распавяла завуч ДЮСШ „Алімп“ па лёгкай атлетыцы Эліна Мікалаеўна Курс. — Нажаль, мы мала ведалі пра гэта мерапрыемства. У наступным годзе будзем ужо падрыхтаваныя. Дзецям было вельмі цікава ўдзельнічаць у эстафеце. Яны пыталі бегуноў, адказвалі на іх пытанні самі. Кожны з дзяцей патрымала паходня. Думаю, успамінаў у іх застанецца вельмі шмат. Дзеці павінны ўдзельнічаць у такіх спаборніцтвах як мага больш. У Магілёве, да прыкладу, бракуе такога маштабнага мерапрыемства. Аднак гэта ўжо — наша праца і праца кіраўніцтва горада».

П. Левановіч